ríu pa quedar

Vengo de la banda
escura,
del llau toriáu
de la esperanza
otra nueche
a beber
nel ríu
onde los sapos
velen
los llirios d'Ofelia,
con un whisky
na mano
y una vela
na otra
vengo
buscar
un as de tréboles
ente l'humeru
furruñentu
de la llaguna Estixa,
con una rosa mustia
ente los dientes
y una navaya
en bolsu
voi
cortar
un palu d'ablanu
pa variar
les estrelles
que ya nun allumen,
voi facer
con elles un garrapiellu
de povisa
y tentar lo imposible:
tizar coles lletres del to nome
otra vez la lluz
que me fexo esta nueche
cruzar el ríu
hasta equí,
hasta equí,
pa quedar.

el tiempu de les mores verdes

El tiempu de les mores verdes

ye'l tiempu de marchar,

cai un pingu

de sangre

en cantu los besos,

fiere

nel aliendu

l'aceru

del nordés,

entós

ye'l tiempu de siguir

la buelga escura

del llobu,

les nueches son cálides

en monte,

los frutos

inda duces,

cuerre y nun mirés

atrás,

pasa la frontera

mientres la brigadilla del mieu

bebi y baila

nes romeríes del branu,

ye'l tiempu de marchar,

el tiempu de les mores verdes

y la lluz esborria

los pasos mal andaos,

los caminos torcíos,

el rastru pegañosu

de la pena,

el tiempu de les mores verdes

ye'l tiempu de correr,

el tiempu de les motos veloces,

pasa la frontera,

siente nel piel respigao

l'arguyu

de los contrabandistes,

el sosiegu tóxicu

de los que fuxen,

dexa que pasen los díes

col corazón vaciu,

enllena l'alma

cuando llegue'l so tiempu

col tastu sonce

de les mores maurecíes.

salvación pol rayu

Una vez,
cuantayá
nun prau de povisa
y buelgues
torcíes,
miróte un rayu
a los güeyos,

la so clin
espelurciao,
puerco,
tamién
de la color
de les derrotes,
el llombu
fundíu
de los qu'andaron
a palos,
gacha estampa
d'un rayu
amatagáu
na folla
y el polvo de los caminos
que nun lleguen
mui llonxe,

gachu,
pequeñu,
bastardu
d'una tormenta
de veranu,

mirábate a los güeyos
ensin nengún enfotu,
por costume
de mirar,

sé qu'aquel animal
nun buscaba cosa,
nun allampiaba
nengún deséu,

y devolviste-y la mirada
al rayu
con idéntica desgana,
por primer vez
en munchu tiempu
sentístete tranquilu,
sosegáu,
en paz coles propies coraes
y col eternu plasmu que sollivia
tola estupidez del mundu.

la llingua vieya del sol

Nun despiertes al tigre,
nun piques a la puerta
de la so furia,

arrímate adulces
a la corredoria l'aire,
que les aristes de la rosa
mustia nun fieran
el carne doloriento,

agora,
cuando más falta fai
una caricia
de cuspe y tierra
contra les ortigues,
que nun esgaye
la llingua el filu sangrín
del aceru
de la vida,
el pesu
d'estos díes
de plombu y solombra,

abellúgate nes nubes mestes,
nel ceguñu cómpliz del sol
qu'abandona 'l so reinu de lluz
pa volver
esllender otru día más,
otru día
indiferente
a que tu lu veas riscar
o seya él solu el que risca ya ensin ti.

los díes de les persianes baxaes

Cuando escample
el cielu del escripión
y sosiegue'l nordés,

cuando vuelva
otru añu
el tiempu de la yerba,
el sol de los díes
ensin mácula,
la fonte
que cura
namás por beber
agua claro,

llonxe del turbión
y el remolin,
de la mala sombra,


habrás alcordate
d'estos díes
que fueron
como culiebres
revueltes,
los díes de les persianes baxaes
porque dolía la lluz,

habrás alcordate
pa remembralo,
pa que d'estos díes,
nos qu'endelgazamos toos,
toos perdimos el norte
y hasta lo último que se pierde,
esperanza...
nada te caya embaxo.

Andamos camín
por cuenta de tolo
que dexamos detrás,
siguimos l'aldu
de los que frayaron,
nun fueron quien
a siguir,
los nuestros pasos
aliméntense
del arguyu y el bravén
de les sos buelgues ocultes,
perdíes ya pa siempre..

al final

Al final
les lluces
de la fiesta
amortecen
como naquella nueche
penúltima del añu
en Viana do Castelo
-sombra sele
d'un aire enforma cáledu
pa ser diciembre-

los pasos inseguros
del silenciu
restallando nes cais,
una povisa
mal apagada
remembrando'l
calicor cómpliz
de les gates de lluz
nun matu de veranu,
un perru con fame
qu'escargata
na refugaya
de la esperanza,

al final
les meses puerques
y les sielles vacies,
l'orpín agriu
del olvidu
encegando
los güeyos,

al final
la voz
que baxa del monte
remotu,
del otru llau
de los díes,
suave
como una caricia
nes manes:

"...faime casu,
habrás arrepentite
cuando ya seya tarde..."

al final
nada, lo escuro,
la voz desobedecida,

la caricia que duel
agora,
que nunca nun va dexar
de doler.

farewell song

Cuando tu marchaste
valera quedó
la cabana de maera
nel bosque,

valera
inda non sola,

Xano,
de doble cara,
encárgase
de tener pola puerta
día y nueche,
y el veranu
tien pola trabe
del techu
mentantu
s'arreglen les coses
equí
dica la prósima seronda,

ya nun suena el to hachu
al escurecer
y una turbolera
borró apocayá,
per San Xuan,
les tos últimes buelgues
vera la cabana,

eso sí,
mentantu
s'arreglen les coses
equí
nel bosque,

siguimos falando de ti,
alcordándonos de ti.