sexta-feira, 27 de fevereiro de 2009

el pactu


Agora que ye de nueche
nun vamos alcontranos
de nueche,

el nuestru pactu
¿qué tien de ver
coles sombres?

prometí buscate
onde empieza
el bon tiempu,
los díes de salir
a monte
y correr
pelos caminos
con ganes de volver,
siempre con ganes
de volver rendíos
a casa,
a dalgún sitiu
onde nos espere
una lluz prendía
y un fueu en caldia,

nun vengo
a rendir cuentes,
Padre,
nun traigo noticies
de lo fríu
que fue esti hibiernu,
del aliendu del llobu
terecíu
na ñeve del bosque
y les fogueres
que mató el xarazu
y la ventisquiada,

llegaron los díes
de salir a monte,
la mano blanca
de la lluz
señalando l'aldu
de los caminos,
otra vuelta
lleguen los díes
de cielu escampláu
y verdeya la herba
nes camperes del Mayáu Solís,


sigo'l destín de ríu
que m'enseñasti

cumplo con esi pactu
qu'esclúi les sombres,
el fríu, l'escaezu.



sábado, 14 de fevereiro de 2009

la tormenta



La tormenta

dexóme

una herba

ente los deos,

arena nes manes,

forgaxes

sueltes

d'un tueru

de carbayu

nel pelo,

la tormenta

entró nes mios venes

como una inyección,

y dixe

les palabres vieyes

que me deprendieron

en casa,

palabres tresmitíes

col sangre

y la fala

pa esconxurar tormentes,

faigo la seña

de la cruz

colos deos

y vuélvola

al revés

pa que tamién

atienda el diablu,

gárrome a la to mano

cómpliz

como a un clavu ardiendo,

agora

que da igual

la tormenta,

si anecia

o abocana.

sábado, 7 de fevereiro de 2009

goterones de febreru


Goterones de febreru,
duelen nes vidayes
como les uñes
d'una cuchiella,
llaven col so fríu
les penes podres,
la sede d'enfotu,
tolos pensamientos
improductivos,
crueles,
aporfiaos,
pinguen en corazón
tamién
como palabres verdaeres
de vieyos amigos.