Al atapecer,
la nueche entera
siento caer les mazanes
na tierra,
proyectiles fallaos
contra l'enemigu
que s'escuende
ente los sombres,
carne mustio
ensin haber sentío
la violencia
d'una boca moza,
asina se cucha
la memoria,
con magaya
de frutos
prematuramente
podres,
asina se maya
la sidra qu'enxuga
na tierra los llabios
de los muertos,
en tapeciendo,
la nueche entera,
hasta que risca'l día
nel castillete furruñentu,
en cantu los cables
de la estación llétrica,
na cadarma trémole
de los pumares,
profano la hostia
de la lluna
colos dientes
de la rabia,
muerdo les mazanes caíes,
enlleno la boca
cola tierra de los muertos.
