Embaxo la nubla nun hai culpa, cuerren llimpios los ríos, les tabiernes prenden fuera una lluz que s'acolumbra de muncho llonxe, conforta l'alma un café caliente,
alluende nes camperes verdes del trébole esmorez los deos el fríu,
nel ermu esborria el nordés tolos caminos,
pregúnto-y por ti al xarazu, a una sombra que t'escaeció pa siempre,
rebusco les tos señes nel misteriu del orpín,
non, cuida que nada nun foi de baldre, que too cambia, entiérrase, nun duel cosa embaxo la nubla-
Con paciencia y enfotu texí una rede ente les sebes del monte, con cordeles esfilachaos de desgana y povisa de díes turbios texí una rede ente los bardiales de la desmemoria y la nada,
marqué la llende en cantu de toles feríes abiertes, punxe'l finxu nel sitiu esactu onde manca nel alma el ríu que tolo lleva,
colos deos tremando, con obstinación, inútilmente texí una rede que nada arrepresa, que tolo dexa escapar.
Fuimos amigos o casi amantes, citábemonos en requexos secretos de la escuridá común,
fuimos lleales a les nuestres complicidaes, a una manera estraña de compartir sombres y respigos,
tu sabíes el tempo esactu de l'alegría nun violín, dialogabes serena con andarines y algoritmos, sabíes la fórmula del dolor de Hamlet namás con despexar la incógnita d'Edipo,
y que tamién la vida ye esa ecuación ensin resultáu posible, una suma d'erros qu'alcuando termina,
remémbrote una nueche nel cuartu d'un hotel de L.luarca, afuera el vendaval, en tientes a media lluz los tos güeyos encesos, de la color del tigre, afirmando y negando un sentíu a tantu enfotu, a tanta perda.
Avieyes, a modu avieyes na hora en que despierten inocentes los animales y la sede, na hora de les sombres que busquen una ruta nueva ente l'últimu sol y les autopistes,
col arguyu pingando ente les manes como un troféu avieyes nel uxar de la curuxa, nos cristales frañaos del tapecer, na lluz del faru que raspia'l piel de la mar del mieu,
con una espada de furia tarazando la bandera del nordés, con un yerbatu de la Isla del Tesoru ente los deos, con migayos del pan blancu de la mocedá nos llabios, avieyes
un día más, otra nueche tienes mieu de que seya la postrera
gaches la tiesta, vuélveste invisible, disfrutes la folixa, engañes a la muerte escondíu ente los matos, engañes a la muerte faciendo que ya nada esperes.
Presta escaecer, afalaga l'oyíu la voz de lo que ya nun se remembra como la música suave de la nueche desprendiéndose de les sos medies de seda,
conforta marchar, apartase, sentir en cantu l'alma respigos llonxanos, la ferida valera d'uñes qu'acusbien alluende, onde'l diablu dio la última voz,
sentir la furia de los díes torcíos abrasar el meruxal de l'alcordanza, como la llingua suave d'un aire de branu enfrescando les vidayes ingrientes de tolo vivío, el llume afogáu de lo que ya nun importa.
Piel, piel claro de la lluz que muerre alló arriba, nel cimbru del vientu, como muerren en corazón los sueños puercos, les complicidaes estrañes, los vezos infieles,
alló arriba, ente la herba alto y les pantasmes del nublayón. al tapecer, muerren de pie les traiciones, los olvidos conscientes, los deberes incumplíos,
onde más tira'l vientu, alló no alto, sobrevivimos a les amistaes perdíes, al rencor de los que s'enfotaron de baldre en nós, a la propia concencia frayada, con fuelgu inda pa combatir el vendaval y les sombres.
Cai la nueche
