miro l'agua a los güeyos

Roza el momentu
colos deos seles del trébole,
colos dientes nudos del vientu.

Toca los xaoyos respigaos
del fueu cola llingua de cristal.

El deséu funde na carne
como un cochellu
nun pan de fornu,
como nuna mantega.

Miro l'agua a los güeyos
cuando te toco,
fálo-y na to llingua
a la nueche
cuando duermen los tigres.

Entemedies del xelu
hai un cantar qu'esbaria,
algama un pingu
hasta la boca.



Afuera,
llonxe
enreda palabres sueltes
el vendaval

Bruques en caldia
d'un llar de tabierna
rises y aguardiente.
Esta nueche
nun duermen
los cazadores.

Y dasme roses
del país del orpín,
promeses que se cumplen
nel aire.

Peruquiera te busque
la lluna,
ende te guarda
l'abellu de los matos
qu'esborrien los caminos,
les pisaes callaes de la muerte.