al aire

Esfueyes tardes
de nubes baxes
en pasear
el cuayu y les coraes
al aire,
-dicíenlo los antigüos:
ye bono
que-yos dea l'aire
a les feríes.

Después vuelves
pa en casa
medio llimpiu,

en fardel
malpenes
el pequeñu tesoru
de la podredume
piadosa:

decisiones
qu'empuerquen les manes
como cereces maúres,
qu'alcuando
rocen los llabios
dexando
un vagu rastru
d'alegría duce
y sucia.