Padre,
ya medró el maíz,
llegó el tiempu
de la estraña harmonía
ente les sos flores doraes
y el cielu fríu d'ochobre,
el tiempu de les colleches perdíes,
tiempu de volver a empezar
por fidelidá a la costume,
ensin esperanza,
negros cuervos
esgranaron les panoyes
agora que duel siempre
l'aire na piel
y ortiga l'alcordanza
los pies desnudos,
sé bien que namás queda esperar
en baldre por colleches meyores,
pola estraña harmonía
ente les flores doraes del maízal
y el cielu fríu d'ochobre.
