Na fonte del adiós,onde la culiebra canta,
bebi l'agua de los díes puros,
empuerca el to alma
nel color de la furia,
cuerre aína
peles camperes verdes
del escaezu que medra
callando como la herba,
l'escaezu que medra
como la herba alto,
lleves nos deos aniellos de renuncia,
lleves al pescuezu el pañuelu
de la muerte,
nun esperes,
bebi l'agua de los díes puros,
cuerre aína
peles camperes verdes
del escaezu,
entaíana nel viaxe
enantes qu'escureza,
si quies marchar
vuelve siempre a la fonte del adiós,
a la fonte onde nació la to sede.
