la compañía

Deprendes
a tar solu
cuando hai gritos
nel cuartu de los nenos,

cuando empieza
la engarradiella
nel patiu
y te duel el tastu
del propiu sangre,

cuando escapa
la carne
de la tristeza
en turbios caleyones
de nueches de veranu,

cuando llega
la primer racha de mala suerte
después de trenta años
xugando,

en díes de nubla
acobiyáu nes sebes lluminoses
de la ciudá
persiguiendo
la sombra de naide

deprendemos a tar solos
y a ver no escuro,

sicasí
arremellamos los güeyos
agradecíos
nel escamplu de la compañía.