memories del porvenir

Alcuérdome del fríu
del xelu na nuca,
de les palabres rotes
pola brisa de febreru,
d'un gurrión coxu
que s'engarraba coles migayes
de la esperanza
una mañana nun llugar
perlloñe de les nuestres tumbes,
del tastu acedu
de l'alegría
como una lluz
remanecía nes seches
de la vida apriesa,
del duldosu falagu
de los velenos
en cantu d'un besu
o d'una llamada inesperada de teléfonu,

alcuérdome del furruñu y el sangre,
de rates puerques fuxendo
a les sos llurigues nuna oriella'l Nalón,
del tastu ensuchu, incómodu
de la ostia, el cuerpu de Cristu
apegándose nel paladar, la puta
santa misa y el padre J.
nel confexonariu: "Cuéntamelo todo,
a mi me puedes engañar, pero a Dios
no, dime, ¿sueñas cosas sucias?",
del fueu escarnabiando
llaceries nes rodielles
arrastraes pol asfaltu
nuna engarradiella de guajes
na que se decidía un destín,
l'aldu de la bona o la mala suerte,

alcuérdome de los domingos,
el camín interminable de los montes
encesos de sol, la voz de mio padre
al llau: "Mira, siéntelu cantar,
ye'l raitán", l'aire bravo
que despierta'l polvo
de les caleyes y raspia
como una descarga llétrica
el corazón dica tolos díes por venir,

alcuérdome d'un trébole
de cuatro fueyes, d'un as
de diamantes, d'una bandada
estorninos tiznando'l cielu
de les promeses y l'alcordanza
una mañana soleyera nun llugar
lloñe de toles hores escures,
perlloñe del dolor y de la última llende,
perlloñe de la última vuelta
del camín qu'andes ensin reparar
pa la sombra enemiga que te sigue'l pasu.