escalera de color

Desaparto los velos turbios
de la ferida,
entro nel xuegu
una vez más,
con pasos de gatu
camino ente tumbes
y tréboles rabiaos de verde,

empobino
una vez más
a la fonte fiel
del escaezu,
al calor d'un llar
que nun alienda
en tierra propio,

conozo el fríu,
les angüeñes,
la mala sombra
de los alboreceres
que manquen
nos güeyos
con un rellugu,

abellúgome
ente felechos
na fonte que nada
remembra,
una vez más
echo les mios cartes
na mesa,
aporfio en xugar.

l'hibiernu del llobu

Llegó el fríu
a los montes del llobu,
llegó la llingua blanca
cola palabra maldita
que borra el rastru
del sangre ente los bardiales,
llegó la nubla y la fame,

llegó el mieu
callando,
respigando'l piel
del llobu qu'acuerda na so cubil,
tremorosu, gachu, alloriáu,

soñó que yera un home,
soñó col resguardu de ciudaes
vieyes y asoleyaes,
con almuerzos calientes
en cafés pequeños
apetiguñaos por xente de pasu,
soñó con mercaos, tranvíes, ilesies,
azulexos azules nos que dalguién
pintara un resume de los sos díes
en monte, les hores propicies
y les nueches llargues, valeres,
les fartures, les victories,
les engarradielles,
la marca de la humildación
en gañote, la marca invisible
de la supervivencia,

soñó que yera un home
con billete de vuelta
a dayures,
un home que pigazaba desprocuáu
nun tren camín de casa,

enarquió'l llombu,
boció col focicu ganosu,
resquemaba nes coraes
la fame,
la lluz precario del día,
alló alluende
restinxendo nes peñes
arispies de los cimbros,
no fondo'l vai,
l'ecu amenaciante
de la muerte
que busca les sos buelgues
na llingua delatora de la ñeve.

corazón de fierro

Corazón de fierro
aliendes nes seches
escures de la ciudá,
respigues el piel
de los que duermen
coles tos angüeñes
de campesín,
profanes la seda
coles tos botes
de soldáu,
cuayes el cercu de lluna
con un cochellu
fríu,

corazón de fierro,
cómpliz de tantes nueches
de velea,
de tantes llamaes valeres
al otru llau de los díes,

escuéndeste
na cubil d'un arguyu
tan vieyu como'l xarazu,
basties y desapaeces
a escondidielles
como'l xarazu,

nun cambies,
nun avieyes,
la to sede
apodera les sombres,
destercia a la muerte
cola so rabia
d'animal acorripiáu,
muerde feroz
el focicu del llobu,
rescalva la furia
de les tormentes.

la última hora

Al escurecer
ziarra los güeyos,
descansa de ver,

arrímate a les sombres,
enxuga d'orpín
les vidayes,
toca'l llombu fríu
del vientu
que respiga
la herba,

besa callando
la navaya
tebia
del últimu sol,

bebi serenu
el velenu duce
de la nueche que vien
xunta ti
como un animal
fiel,
brinda con ella
pola lluz naciente
d'otru día
pola lluz naciente
de la última hora.

esconxuru de la fiesta

Con felechos secos
y forgaxa del árbol baltiáu
tresnes el to ñeru
esta nueche
de fiesta
agora que toos duermen

con plumbes musties
d'ánxeles caíos,
con povisa
d'axendes vieyes,
acomodes un camaretu
al corredor,
agospies un fuelgu
a la rabia
del animal
que nunca cansa,

con febres de tabaco
y balagares de seda
tresnes el to ñeru
esta nueche
na que les manes
del deséu
tornen la muerte
n'acesmu
cola llingua allampiada
y los deos ardiendo.

el nome ocultu de la truena

Llonxe, siempre
llonxe, ún ye siempre
el que ta llonxe,
onde a naide se busca,
cerca namás
del país de niundes,

búscame nel corazón
solombriegu d'una bodega de Porto,
en cantu d'una zreza
qu'entafarra la llingua
de promeses,

búscame ente los trenes
que marchen,
nel ecu fonderu del bosque
que tapez los caminos
con sebes de lloréu
y artadal,

llonxe, siempre llonxe,
onde les nubes bebin
nun regueru
les sos palabres escures,
el nome ocultu de la truena.

Camín del Baile

Sábados furruñentos del 82
camín del Baile, del Madison,
la hora emocionante de cruzar el ríu
como una frontera,
contrabandistes
a cara descubierta,
la mercancía pasaba
de mano en mano,
de boca en boca,

terez el piel inda
el fríu de les tardes de los sábados
del hibiernu del 82,

el paraísu nuna parada d'autobús
de la carretera xeneral
sepultada de polvo gris
y cisca de carbón,

los tacones altos de la Rápida
esconxurando la xelada
y la mirada altanera d'aquella
moza de les piernes llargues,

freddy pintaba los llabios
nos escaparates puercos
d'un chigre abandonáu
y lauro prometía solemne
dir brindar con una garrafa
de vino peleón na tumba de Kerouac,

sábados furruñentos del 82,
terez nel piel el so fríu,
despierta el corazón
del contrabandista
qu'inda cruza la frontera
camín del Baile,
de cualquier Baile.

campaneru

Entres a escondidielles
nel sobráu de la Casa Xunta'l Ríu,
a media tarde, inda la lluz
dexa entever les paredes afumiaes
de calores antiguos,

andes a gates furtiando
mentires y telarañes,
cuidando de nun vencer
el pisu precariu de maera,
de nun despertar la ira de los cielos
nel techu entrampiáu pola ruina
y los sueños corrosivos de los mures,

embaxo eses tableres podres
alendó una vez l'aventura
nel pechu escitáu d'un nenu,
fervió el lleche nel fueu,
santiguóse el mieu a la truena
nel nome benditu de Santa Bárbola,
allumaron veles en tartes de cumpliaños,
respigóse el carne de los débiles
una nueche na que'l diablu armó
la de coyer y fuxó el gatu
espantáu ente carreres y voces
alloquecíes, o aquella otra nueche
na que picó la muerte a la ventana
coles sos uñes restorcíes
y nun yera naide, namás el cutu
tarazador de xineru esfreciendo
la cocina valera, un corazón vieyu,

agora
sales del sobráu
puercu de nada,
ye la última vez
-nun hai otra-
qu'entres na Casa Xunta'l Ríu,

respires fondo
l'aire impuro del escurecer
nel corazón del vai,
la mesma bocanada
que tingla na campana
de llamar a conceyu
y que llama agora por naide.

el sol de los inválidos

Los díes de furia,
arregañando al cielu
los dientes feroces
del animal xoven,
pasaron bien lluego,

mustiaron cuantayá
les cheires ingrientes
del artadal,

cuantayá
dobló la esquina
el coche de los lladrones
col botín del últimu güelpe
audaz,

quién s'alcuerda agora
cuándo
se marafundió
el tesoru,
la vuelta a la costume
triste, al llume tebiu
de les hores corrientes,

había un llugar
bien cerca
onde'l llobu y el tigre
yeren foriatos,
onde dala cosa
entaínaba
pisando l'acelerador,
onde lo normal
yera sentir
el filu del aceru
en gañote,
enfastiu,
ganes de fuxir
a niundes,

quién remembra ya
l'oru arguyosu
de los díes de furia,
l'escamplu falsu
del sol de los inválidos
cariciando los sos miembros baldaos
como un fríu
al que -ensin remediu-
acabamos avezándonos.

el rastru de la culiebra

Como una copa
de vino desvelando
secretos incómodos,
como un diamante
que fiere nes manes,
como un llátigu
que restalla l'alma,

asina escampla
la lluz del alborecer
nunos güeyos cansos,
asina se guarda
la ira nel resquiciu más fríu
del corazón,

nel rastru de la culiebra
deprendimos
que tolos caminos lleven
llonxe de casa
dica nós mesmos.