alecrim

La primer vez
que tuvisti solu,
solu de verdá,
fue nuna ciudá
cálida del sur,

cuantayá,
el branu húmedu
pegándose na piel,
alló
nun caleyón
desanubiertu
l'aire pequeñu d'un alecrim.

Solu
nel cumal de los díes grandes,
alluende abaxo
la ciudá encesa afrescándose en ríu,
sentiste en pescuezu
el raspiar de la soga,
la seña que llamen los pirates
rebusquinos
de la muerte...

Inda nunca
miraras
la culiebra
a los güeyos.

Solu.
Dexaba el mieu
un rastru pela ciudá
menos fuerte que l'alecrim.