señes

Busco señes
del to pasu
pel monte
ente matos
de felechu y
flores de cotolla,

sigo'l to rastru
hasta'l puntu esactu
onde desapaez,
xusto na oriella
del regatu,
vera los ablanos,

agora que pasó
tantu tiempu,
tantos díes de nubla,
rescamplo
una nueva pista
de to
equí abaxo,
na ciudá,

buscóla en bares
que nunca piesllen,
en paraes de taxi
y autobús, en tiendes
d'animales,
dientro
la xaula del loru
que naide quier
y nel ñeru precariu
de los ratos
que duermen tol día
nel so ñeru de forgaxes
y despierten cola nueche
pa dar vueltes
ensin fuelgu
nuna noria
de plástico blanco,

busco el rastru
ente contenedores
de basoria y nel perfil
afiláu
de les esquines,
nel vafu fedorientu
de les cantarielles
y del ríu que pasa
pel nuestru pueblu,

too de baldre,
en vano,

marchasti pa nun volver,
pa nunca enxamás
volver,

búscote nel polvo
arremolinao del vientu,
en cantu de cuatro palabres
que namás resquemen
en corazón
del que les diz,
en corazón del que diz
que la nueche ye llarga
y nun hai camín.

Llegó la hora
de cumplir la llei,
agora que too ta llonxe
y nada importa.

Una probe de pidir
llegó preguntando por Hamlet:
"Rapaz, ye hora
de qu'ocupes el sitiu
de to padre".

Escoyéi el meyor caballu,
apareyalu curiosu,
ensiellái-ylu y axeitá-y
el bocáu de plata,
enllenái les alforxes
de tolo que-y queda a Hamlet,
nada nun dexéis equí,
nin remordimientos
nin señaldaes.

Llegó la hora de marchar,
cumple agora que la llei
calque con fierro na carne,
que-y duelga a Hamlet
como una puñalada
nes coraes.

La vida entainó
ente cancios de xilgueru
y mañanes enceses
de veranu,
medraron nel xardín
de la inocencia
flores crueles,
matos de mala raxa.

Llegó la hora,
llegó ya la hora
de que Hamlet
ocupe'l sitiu de so padre.

Tenéi pol caballu,
garra-ylu peles riendes
en curtio, aidái montar
al xinete, a Hamlet,
ye él el que marcha
dica'l so destín,
dica la so conderga.

Preparái un caballu
pa Hamelt, pal que
tien marchar porque
ta llonxe, enforma llonxe
de tolo que perdió.

Preguntái al vientu
a una sombra, al cuquiellu,
cuándo muerre Hamlet
después d'ocupar
el sitiu de so padre,
cuándo vence la llei
ente tréboles puercos
de polvo
y mapoles ensangrientaes.

El Fielatu

Nueches de xuno del 83
escavando trincheres
contra l'enfastiu
y los díes por venir

En pasando El Fielatu
de Santana
Había tigres ingrientos
como los de Blake
Y mocines roxes
col pubis afaitáu

Peles esquines
más céntriques
del pueblu
acusbiaben sombres
con gabardina
y les pantasmes
paseaben de la mano
o comíen pipes
arrastrándose ente'l polvo
de la carretera xeneral

Al otru llau del Fielatu
había isles,
la tierra prometida
tres les parves de cuchu
y l'ermu de cisca
de les escombreres

Había arumes estraños
qu'afalaben marchar
buscalos
dica niundes,
fogueres llonxanes
qu'allumaben tres los montes,
más alló del puertu,
alluende
en corazón del bosque
l'agullíu del llobu
llamando a siguilu.

En pasando El Fielatu,
había un santuariu Zen
y el Mercedes Benz
de Janis Joplin,
había un bar escuru
y Johnny Cash
remembrándonos
que cualaquiera
puede acabar dando
colos sos güesos
nuna celda de San Quintín.

promesa

Promesa,
escaezo el to nome
na fala llimpio
del agua,

con guantes de seda
dexo'l to piel
al debalu
del nordés,

entrego les mios armes
canses a la borrina,
a una tarde de calisma,
al mofu verde
del embarcaderu,
a la corriente
qu'arrastra dica niundes
les penes
puerques d'arena,

dexo nes manes del aire
el perdón y la povisa
del to piel cáledu,
promesa,

promesa de nada,
remordimientu
que nun duel.

como si nada acabare

Sigues l'instintu
del vientu
cuando tira
de niundes
respigando
el llombu
de la nueche,
la ciudá
cercada
pol incendiu
de lluces lléctriques,
pol fulgor
inasible
de la lluna,

conoces
los mesmos caminos,
les mesmes cais,
l'aldu
del cielu nublu
n'acesmu
dica un destín
que baila
con un as de tréboles
na mano y una botella
na otra
abrazáu
a l'alegría,

col aliendu
de los que ya nun tán,
colos güeyos
qu'un día
van dexar de ver
el llombu esbariadizu
de la culiebra,
la promesa encesa
de les cereces
nel so tiempu,
la lluz de los faros llonxanos,
mires en tientes
la escuridá,
sigues bailando
como si nada acabare,
como si nada.

despidida

Ente matos
de toxu
alcontré
el camín
de la culiebra,

nun busques
les sos buelgues,
per ú pasa
nun dexa
rastru na herba,

onde canta
cerca l'agua
nun acusbia
el so cuerpu
escapadizu,

escuéndese
na tierra que nun se ve,
nos rellugos tapecíos
del amanecerín,
callando
na solombra,

nun busques
el destín de la culiebra,

lo nueso
ye dexar buelgues,
rastru de que tuvimos
dayures
y hebo alcuando
dalguién
-otru corazón cutiendo-
cerca.

suave como la nueche

Suave como la nueche
llega la desventura,

la so llingua de
duce velenu

el falagu calláu
en corazón,

y too abulta
más sereno,
menos costoso,

desque sabes

que les sos armes
fieren y nun manquen,

coles ales abiertes
llega la desventura

como una lluna
infestada
d'escuridá
el so llume
arrepresa la tierra
entero,

cada pasu
que das
llévalu ella
suave
ente les sos garres.