alluende crúcense barcos

Por mor del xarazu
perdisti los caminos,
vinieron buscate
a última hora
nuna rabesera de nordés,

d'equí a la nueche
inda queda un aliendu
del to andar azoráu
per esti llau
de les circunstancies,
buelgues
de qu'alcuando
tuvisti
como un silenciu
ente nós,

olvídote
solombra,

alluende
crúcense barcos,
destinos,

xente que vive
como tu
na llende,

de pasu.

el retratista

El retratista
aprucía de les sombres
na romería
cola pata coxa
y los güeyos llorosos,

preguntába-yos el nome
a los matos y a los corchos
de sidra, a les nubes
y a los páxaros que nunca
se dexen ver,
preguntába-yos el nome
a les madres solteres
y a los neños feos,
a les puertes entornaes
de les cases de naide,
a la povisa, a un borrachu
amoriando metanes el baile,

brindaba al cielu
con un dedal
d'anís de guindes
y agradecía-y
al orpín
el falagu turbiu
de la lluz
que moya
adulces
toles feríes,

retrataba
por tres cuartos
el rostru
de la felicidá precario,
el llume
fugaz
del besu, la mano
que robla l'amistá
mientres
permaneza la lluna
o l'aire, mientres
nun cuerra'l tiempu,
la foyasca
de tolo que se pierde,

después volvía
brindar al cielu
col so dedal
d'anís de guindes,
brindaba
hasta que la voluntá
lu enfilaba
otra vuelta
al so camín
alluende les sombres,
dica la prósima romería,
dica la última romería.

la tierra d'Adán

Alborez
nublo
na tierra d'Adán
-acero frío
espetao
nel so piel sonce
de yerba-

al otru llau
de los montes
nel fondo'l vai
esconsoña
l'home d'ayer,
un muertu
fartu de durmir,

abre adulces
los güeyos,
duel l'orpín
na niñina
inda dilatada
de soñar
mares blancos,
los contornos
borrosos
de la isla
onde medren
les uñes de los muertos
y la flor del olvidu,

nel oxal
la rosa mustia
y un as de piques
en bolsu la pechera
como un pañuelu,

en bolsu
un respigu de fierro,
la llave del cuartu
onde descansó
de vivir
una nueche
cuantayá,

esconsoña,
llevántase
de la tumba,
alza al cielu
la llave
como una espada,

sabe qu'esa llave
puede
provocar la truena
y abocanala,
con esa llave
podía estruir
el mundu,
volver crealu,
abrir con ella
l'estoyu secretu
de l'alegría
y el placer,

sabe tamién
qu'esa llave
ya nun val
pa entrar
nel cuartu
onde descansó
de vivir
una nueche
cuantayá,

que'l día ye nublu
-acero frío
espetao
nel so piel sonce
de yerba-
cuando alborez
na tierra d'Adán.

amigu (in memoriam m.g.)

Si hai alma
-dicíes-
tien ser un felpeyu
puercu, mugorientu,
una cosa
inmundo
dientro un cuerpu
de por sigo
nada llimpiu,
dalgo asemeyáo
a un concomiu
o a un rensíu
vieyu.

Agora
después de tantu tiempu,
agora que ya nun importa,
arrepostio-y
a la to desgana
de creyer y de vivir
con un convencimientu
sentíu
en cantu de lo que nun sé si será
alma, corazón, memoria vivo:

si hai alma,
a la de to
nun algamaben los mures,
les culiebres,
nenguna gafura
llograba empodriellala,

pasaron los años,
el fríu, la muerte,
guardo alcordanza
del to alma
de condenáu
como un horru na nueche,
un castiellu inespugnable
pa les menudencies
velenoses,

pasen los años
y nun cambio
de pensar,

fuiste un fatu
por dexate rendir
por dexanos solos
n'amarraza,
engarrándonos
contra les solombres,
tamién por ti,
amigu,
tamién por ti.

escontra'l cielu

Cuando'l cielu
esbarrumbe
la so ira
enriba la tierra,
cuando
tol nublu
n'acesmu
afuegue
l'aliendu
de los praos verdes,
cuando'l pesu
de la nada
más alta,
del bafu
gris
de Dios,
el destín,
la suerte,
puxen
escontra
les tos manes de yerba,

gárrate a lo que se toca,
al carne y a los raigaños,
tente firme
en suelu
de la tierra
que ye tuya,
la tierra
qu'andes,

cuando amenace'l cielu
pisa más fondo,
entaína'l pasu,
caricia
cualaquier
lluz trémole,
desnuda,

cualaquier
respigu.

homenaxe

Cai la nueche
enriba los praos
arrosaos de povisa,

cai la povisa
enriba les tumbes
secretes de la escombrera

conozo un sitiu
onde calla'l ríu

un sitiu
onde'l ferruñu
escaez
la rabia
y la pena

con pasos de gatu
cai la nueche

conozo'l rastru
del orpín,
la llingua sele
que respiga
los felechos
y l'alcordanza

homes bravos
de Mata y Flórez

col vuestru enfotu
texo un cobertor
d'alboraes clares

col rixu de los que nun
pudistis fuxir

los que quedásteis
equí
empozaos
en tierra de niundes

el vuestru corazón
prende'l llume
montés
de les estrelles fugaces,
el caricós
d'una foguera
qu'inda escalez
cuando cai la nueche

cuando caéis

podrecen los nomes
en cantu mafientu
d'una cruz
de palu.

llar de niundes

Llevanto la leve
piel de la llaceria,
asoléyola
o déxola
albintestate del orpín,
alcuando
tamién la rabia
llámbela furiosa
áidala a cicatrizar,

embaxo esa tela
casi tresparente,
con esi techu ruin
enriba
llevanto una casa,

con rabeseres
de nordés
llevanto les paredes,
con arena suelto
llanto los cimientos,

alzo una casa
na fería en carnes,
abellúgome nella
del fríu y del xarazu,
de los nublayones
del dolor y de la pena,

descanso
a resguardu
en cantu la llaceria,

xuego a morar
nun llar de niundes.