Porto, 1956 por Manuel de Oliveira

Les buelgues del fueu

En ciudaes

qu'enfrescó

l'amistá y l'alegría

como agua de Mayu,

col corazón

encesu

de cielos claros,

los güeyos

arremellaos

de verdá,

ende había

una fonte

que corría

escontra la sede

de morrer,

una casa

lluminosa

onde'l destín

reposaba

en nueches

cáides

al llau de la esperanza,

neses ciudaes

onde doblamos

el pescuezu

pa vomitar

los sueños

sollertes

de les estrelles

y el felén duce

de la lluna

en cais

qu'enveredaben toes

al chigre

de la derrota

llúcida,

consciente,

per eses cais

estreches

y tristes

cuando llueve

habremos volver

cola razón

de la mano

como una moñeca

de trapu,

cola única razón

que nos empobinó

andar camín

perende aculló

dica la última razón,

l'últimu fueu

ardiendo nos güeyos.

la pequeña muerte

Llevanto'l piel

de la ferida,

nun duel

cuando

te toco

cola punta los deos

sele

pa que nun perciba

la vibración

de l'alegría

nos filos de la so rede

sollerte

l'araña,

siento

otros deos

deos de rosa

cariciándome'l pene erectu,

formulo un deséu

agora que la lluz

alluma'l cuartu enteru

y les monedes

chisquen l'agua

nel fondu del pozu,

quién nos diera

una muerte

tan llimpia

tan íntima

como la pequeña muerte

d'esta hora.

la casa de la memoria

Detrás de la casa

había un pumar,

un ríu, una fonte,

feríes

abiertes

y un rencor

que tampoco curó

enxamás,

al otru llau de la muria

había un cementeriu

pequeñu,

los nenos xugaben

ente les cruces podres

de les tumbes,

alcuérdome tamién

d'un pozu d'agua

onde les muyeres

sacaben calderaos

de díes toos iguales,

agua fresco

pa la sede

de díes meyores,

a la otra banda,

delantre la casa

hai un camín

que tira

pal cruce

de la carretera xeneral,

la salida

del llaberintu

enllordiáu,

porque tamién

de les llamargues

de la memoria

se puede fuxir.

farmacia de guardia

Como'l cuchu

vuelve a la tierra

fecundando

el vientre

de la ería,

funden

nel alma

palabres podres

de díes

nos que fuimos

meyores qu'agora,

reviven los merucos

con un pingu

d'esi sangre

del corazón

del orpín,

atopámonos

en díes meyores

a los d'agora

al otru llau del ríu,

daquella

hasta les fontes

secretes

del monte

esquitaben agua claro,

veleno inocuo

pa la sede

de mal,

esta nueche

l'arrepentimientu

ye la lluz encesa

d'una farmacia de guardia

al otru llau del ríu.

el pactu

Agora que ye de nueche
nun vamos alcontranos
de nueche,

el nuestru pactu
¿qué tien de ver
coles sombres?

prometí buscate
onde empieza
el bon tiempu,
los díes de salir
a monte
y correr
pelos caminos
con ganes de volver,
siempre con ganes
de volver rendíos
a casa,
a dalgún sitiu
onde nos espere
una lluz prendía
y un fueu en caldia,

nun vengo
a rendir cuentes,
Padre,
nun traigo noticies
de lo fríu
que fue esti hibiernu,
del aliendu del llobu
terecíu
na ñeve del bosque
y les fogueres
que mató el xarazu
y la ventisquiada,

llegaron los díes
de salir a monte,
la mano blanca
de la lluz
señalando l'aldu
de los caminos,
otra vuelta
lleguen los díes
de cielu escampláu
y verdeya la herba
nes camperes del Mayáu Solís,


sigo'l destín de ríu
que m'enseñasti

cumplo con esi pactu
qu'esclúi les sombres,
el fríu, l'escaezu.

la tormenta

La tormenta

dexóme

una herba

ente los deos,

arena nes manes,

forgaxes

sueltes

d'un tueru

de carbayu

nel pelo,

la tormenta

entró nes mios venes

como una inyección,

y dixe

les palabres vieyes

que me deprendieron

en casa,

palabres tresmitíes

col sangre

y la fala

pa esconxurar tormentes,

faigo la seña

de la cruz

colos deos

y vuélvola

al revés

pa que tamién

atienda el diablu,

gárrome a la to mano

cómpliz

como a un clavu ardiendo,

agora

que da igual

la tormenta,

si anecia

o abocana.

goterones de febreru

Goterones de febreru,

duelen nes vidayes

como les uñes

d'una cuchiella,

llaven col so fríu

les penes podres,

la sede d'enfotu,

tolos pensamientos

improductivos,

crueles,

aporfiaos,

pinguen en corazón

tamién

como palabres verdaeres

de vieyos amigos.

manes d'agua

Manes d'agua,

búsquenme

nes coraes blanques

de la incerteza,

na conderga

cansada

de los mios propios pasos

dica el destín

onde too se cumple

como una maldición,

abellúgome

nesa caricia fría,

dexo que l'agua claro

inunde les mios venes,

contamine de pureza

el mio sangre vieyo

condenao a perpetuase.

un llugar

Per escuros

recovecos

y carreteres

restorcíes

como culiebres

llegué a un llugar

onde'l sol

tamién podrez,

descompónse

igual que'l pescao

y los sentimientos nobles,

corrí, bien que corrí

pa llegar hasta equí,

corrí,

pisé l'acelerador,

quemé llitros

de gasolina,

quemé les ceyes

nel llar de la velocidá

y el peligru

namás por buscar

un sitiu onde

llevantar un templu

coles tos forgaxes

mafientes,

un abellugu

col llume matáu

de la to sombra

llonxana,

namás por llegar

a dayures,

por topar

una tierra

ensin llendes

onde posar

la rabia

y la pena

llegué hasta equí,

un llugar onde Dios

dio la última voz

y el Diablu persínase.

cuartu fríu

La carne ama

les alboraes fríes,

los cuartos alquilaos,

les ciudaes de pasu,

el rancor

arrímase al corazón

nerviosu de los animales,

escalienta

al calor de les fogueres

medio apagaes,

añera en pechu

como un gritu

fondu,

pero la carne

rocea del rancor

como'l llobu

del rastru de la ñeve,

como la caricia

del cuerpu que

nun s'estremez,

la buelga sonámbula

Guardo,

añerao ente les manes

el calor de la povisa

y los rebusquinos

del mieu,

escalezo la pena

nesi llume

probe,

rescamplo

un nome

de solombra

metanes

la truena,

sí, tamién yo m'alcuerdo

agora como d'un tastu agriu

del vuelu sonce

de les grulles

y de la iirefugable atracción

pola nueche y la so velocidá llétrica,

pola buelga sonámbula

del deséu qu'escapa

ente lluces confuses.

el corazón del llobu

Llume acedo
del corazón del llobu
entrasti na ciudá,
respigues
les cais
desanubiertes
col aliendu
prendíu
nes coraes
del bosque,

lleguesti como l'iviernu
pa quedar,

llume acedo
del corazón del llobu,
ensucha la suerte
na to llingua
d'oro vieyo


pinga nes vidayes
el sudu fríu
de les tos buelgues
famientes

vinisti pa quedar.

al aire

Esfueyes tardes
de nubes baxes
en pasear
el cuayu y les coraes
al aire,
-dicíenlo los antigüos:
ye bono
que-yos dea l'aire
a les feríes.

Después vuelves
pa en casa
medio llimpiu,

en fardel
malpenes
el pequeñu tesoru
de la podredume
piadosa:

decisiones
qu'empuerquen les manes
como cereces maúres,
qu'alcuando
rocen los llabios
dexando
un vagu rastru
d'alegría duce
y sucia.

Vuelvo a cavar
Na tierra llento
De la llamarga,

equí ye dócil
el piel de yerba,
los raigaños
fráxiles,

cavar y fundir los pies
na llosa ye ende
la mesma acción,

llevanto los tapinos
cola yema de los deos,

caricio nel sucu
el calor de les mios propies
venes
Vengo a cavar
otru día
a la tierra llento

vuelvo picar
a una puerta invisible,
al otru llau
siéntese'l marmuriu
de voces familiares,

llevántome
bien ceo,
camino hasta la ería
de xunta'l llagu,
ende nun ye raro
atopar
gansos selvaxes
cortexando

ellí fundo la fesoria,
destapino la tierra
coles yemes de los deos,
alcuando
los díes más nublos
dexen posar una perla
ente les angüeñes de les manes.

la derrota

Furgo nes feríes

como'l que llee

una y otra vuelta

cartes de munchayá,

agora el dolor

ye una compañía

amable,

el roce sele

d'una costume,

nun manca

l'alcordanza

royendo el corazón,

miro atrás

y la derrota

ye un animal

que me mira

colos güeyos mansos.

equipaxe de mano

Suave

como'l fríu

qu'abre les llaceries

na seronda,

amargo

como la espera

de les grulles,

foi medrando en nós

esta costume

rara de vivir,

la mala zuna

d'escaecer

-como lladrones-

los pasos andaos,

asina cruzamos

les puentes

del desesperu,

asina vamos engañando

a la derrota,

el corazón

en carnes,

nes manes

nada,

nos bolsos

nada que naide

nun pueda ver.

los dados del orpín

Esta nueche

cayéronme nes manes

los dados del orpín,

pingos insasibles

de lluz

dividen el mundu

ente lo qu'inda mueya

y lo qu'amiya de baldre

en carne seco,

según m'enxugaron

nes vidayes

voltiélos al aire

pa que siguieran

el so camín

dica la suerte

qu'inda nun llegó,

dica la mala suerte

que fuxe namás

n'amenaciándola

cola boca grande

de come-y l'alma.

pasos

Ensin querer
sigo los pasos
que me lleven
al sitiu de partida,
a un cuartu peslláu
con llave,
a una cocina
qu'escampla
de les sombres
namás con prender
el botón de la lluz,
al sotambiu
onde quedó
apolveciendo
un rostru
enforma inocente,

vuelvo
de cuantayá
a niundes
colos pies escalzos
ente cristales rotos,

agora ya sé que nada vieyo
fiere y que de la vida
namás los pasos perdíos
vuelven fozar en corazón
como besties famientes.

aliendu

Cayó la casa de Custodia
y la casa d'Horacio,
cayeron les Venti Cases
y les cases del Ponticu,
cayó tamién la nuestra casa,
Padre, la casa onde deprendimos
a tar xuntos y a esconxurar
el fríu y les tormentes
coles palabres esactes,
el calor de la to mano
guiándome nes sombres,
les tos gargayaes fondes
riéndose del mieu,

cayeron les cases y los carbayos
que teníen pol cielu de los díes
enraigonaos en corazón de la tierra,
cayeron tolos carbayos ya,
duelen en cantu l'alma
los sos raigaños desanubiertos,

cayeron les cases que conocimos
y los carbayos más firmes,

en nueches fríes
alcuando vuelve el calor de les tos manes,
un falagu cómpliz
que m'afala volver
a onde ya nada nuestro queda, Padre,
a onde cayeron toles cases,
tolos teyaos de la esperanza,

albintestate de la seronda
-escribaya con deos sangrientos
el so nome na ventana de la nueche-,
ensin llar onde escalecer
nin fueu que tizar,
arrímome al llume del televisor
nun cuartu escuru
onde bien cerca
rescampla la seña el to aliendu,
sé que rescampla
un niciu del to calor
nel posu foscu de les solombres definitivamente fríes.